Bıyl Almatyny abattandyrý jumysy qatty júrgizildi. Alyp shahardyń ózgeshe sıpatqa bet alǵanyn bizdiń de kózimiz kórip, kóńilimiz ornyǵyp edi. Kóshe-kóshede jaıaý júrginshiler joly kóbeıe bastady. Velosıped jolaǵyn arttyrýǵa da bılik shyndap kiristi. Ol úshin bórkimizdi aspanǵa atpasaq ta, kádimgideı ishimiz jylyp qalǵan. Óıtkeni tynysy tarylǵan qalanyń ekologıasyna bul asa qajet.
Qala degen qandaı bolýy kerek ózi? Qala degen qarapaıym halyqtyń qamsyz ómir súrýine yńǵaıly bolýy kerek. Al kólik joldary men turaqtary – ekinshi kezektegi nárse.
Hosh. Aýqymnan aýa jaıylmaı, negizgi máselege kósheıik.
Ótken aptada Ulttyq kásipkerler palatasy bastaǵan bir top bıznesmen joǵaryda aıtylǵan ózgeristerge qarsy shyqty. Olar «Qonaev kóshesindegi velojolaqty alyp tastap, onyń ornyna qaıtadan kólik turaǵy salynsyn» degen talap qoıdy. Kásipkerlerdiń sózinshe, velosıped jolaǵynyń kesirinen saýda ortalyǵyna keletinderdiń sany kúrt azaıǵan. Kire berisi jabyq turǵandyqtan, satyp alýshylar kólik qoıatyn oryn tappaı, sandalyp qalady eken. Aıtpaqshy, klıentterimizden qaǵyldyq dep málimdeme jasaǵan 95 kásipkerdiń túgelge jýyǵy «Vosqod» dúkenindegi saýda núktelerin jalǵa alǵan bolyp shyqty. Iaǵnı bul – búkil qalanyń emes, alaqandaı ǵana «Vosqodtaǵy» at tóbelindeı kásipkerlerdiń sharýasy degen sóz.
Bul týraly Almaty UKP-nyń jańa taǵaıyndalǵan jetekshisi ne oılaıdy eken? Al bizdiń oıymyzsha, Dinmuhammed Ábsattarov qalanyń jaı-japsarynan beıhabar sıaqty. Birdeńeden habary bolsa, velojolaqqa soqtyqpas edi. Álde kók tútinge kómilgen Almatynyń aýasyn kóp kóre me eken? Onsyz da kóringen jerdi kólik turaǵyna aınaldyryp bittik. Avtotrafıkti shektep jatqanymyz beseneden belgili jaıt qoı. Endeshe Dinmuhammed Ábsattarovtyń aıaq astynan shı shyǵarǵanyna jol bolsyn.
Ábsattarovtyń jekemenshik tasymaldaýshy kompanıalardy bıtin salyp qorǵashtap júrgenin kórgende tipti qarnyń ashady. Onyń baspasóz qyzmeti «tasymaldaýshylardyń hali múshkil» degen syńaıdaǵy relızderin jan-jaqqa qarsha boratyp jatyr. Dinmuhammed Bolatulynyń ózge óńirden kelgeni bilinip-aq tur. Ózi sol avtoparkterge tıesili avtobýstarǵa otyryp kórdi me eken? Áldekimderdiń shashbaýyn kótermes buryn kók tútin qusqan ańǵal-sańǵal avtobýstarmen qalany bir aınalyp shyqsynshy. Bálkim sonda pikiri ózgerer.
Aıtqan saıyn aýzyń qyshıdy. Sanany sansyratqan saýal kóp. Ábsattarov qala jaǵalaǵan qazaqtyń turmysyn bile me eken? Álde ol eldegi jaǵdaıdy teledıdardan ǵana kórip, oı túıetin adam ba?
Árıne, Ábsattarov myrza kásipkerlerdiń quqyǵyn qorǵaı bersin. Biraq turǵyndarǵa zıanyn tıgizbesin.
Ózi qanatynyń astyna alyp júrgen kásipkerlerdiń ne tyndyrǵanyn jazda kórdik qoı. Kóshe boılaı ósken kóleńkeli aǵashtardy otap, turaq qaltalaryn salyp tastaǵan. Shirigen avtobýstary qalada júıtkip júr. Sonyń bárin oılaǵanda keýdeni zil, kóńildi muń basady.
Ras, ańyzǵa aınalǵan Almaty, aport ańqyǵan salqyn sabat Almaty kelmeske ketken. Sonda da barymyzdy saqtap, joǵymyzdy túgendeýge múmkindik bar. Tek Ábsattarov sıaqtylar álekedeı jalanyp shyqpasa...
